Rusia nuk do të ndalë operacionin e saj ushtarak në Ukrainë para raundit të radhës të negociatave për paqe, tha ministri i Jashtëm Sergei Lavrov.
Në një intervistë për televizionin shtetëror rus, Lavrov tha se Vladimir Putin kishte urdhëruar pezullimin e veprimeve ushtarake gjatë raundit të parë të bisedimeve, por situata që prej asaj kohe ka ndryshuar.
“Pasi u bindëm që ukrainasit nuk kishin ndërmend të ndalnin veprimet e tyre, u mor vendimi që operacioni të mos pezullohet deri sa të arrihet një marrëveshje përfundimtare”, tha Lavrov.
Ministri i Jashtëm rus akuzoi Kievin javën e kaluar se i kishte dorëzuar një marrëveshje të papranueshme paqeje, që devijonte nga pikat për të cilat palët kishin rënë dakord më parë. Ukraina i hodhi poshtë pretendimet dhe i quajti taktika për të tërhequr vëmendjen nga akuzat për krime lufte.
Lavrov gjithashtu i quajti thirrjet e Përfaqësuesit të Lartë të BE për Politikat e Jashtme, Josep Borrel, për të armatosur Ukrainën, si një “kthesë të rëndë” të politikave europiane.
