Fituesi i zgjedhjeve Presidenciale në Francë do të vendoset më 24 prill, datë kur do të mbahet edhe balotazhi mes Presidentit në detyrë, Emmanuel Macron dhe Mariine le Pen.
Në raundin e parë të zgjedhjeve, Macron pati një avantazh prej 4.2 % më shumë se le Pen, por ajo që tërheq vëmendjen është fakti se rreth 45 % e francezëve e pozicionuan votën e tyre në ekstremet politike, të së djathtës dhe të së majtës.
Pas publikimit të rezultateve, kandidatja e “Rassemblement National” – “Bashkimi Kombëtar”, u bëri thirrje francezëve që nuk votuan për Macron në raundin e parë, t’ia besojnë asaj drejtimin e vendit për pesë vitet e ardhshme.
Në një fjalim të shkurtër, le Pen tha se do të ishte presidente e të gjithë popullit dhe preku të gjitha temat e fushatës së saj, nga rivendosja e vlerave franceze, te kontrolli i emigracionit dhe siguria për të gjithë. Teksa mbështetësit e saj brohorisnin “do të fitojmë”, ajo tha: “Do ta ndreq unë Francën brenda pesë vitesh. Nuk do të pres aspak për të realizuar synimin tim, ribashkimin e Francës së ndarë, që po vuan nga pushteti i deritanishëm”.
Por kandidatët e tjerë që nuk fituan, nga i gjithë spektri politik, bënë thirrje që në balotazh vota t’i kalojë presidentit në detyrë.
Kandidatja konservatore, Valerie Pécresse: tha “Afërsia e Le Pen me Vladimir Putin e diskrediton atë nga mbrojtja e interesave të vendit tonë në këto kohë kaq tragjike. Zgjedhja e saj do të bënte që Franca të kthehej në një vend të parëndësishëm në skenën ndërkombëtare dhe europiane”.
Edhe kandidatja e Partisë Socialiste, Anne Hidalgo, bëri thirrje që të votohet për Macron, “në mënyrë që Franca të mos bjerë në urrejtje”. Të njëjtën lutje patën për votuesit e tyre edhe Fabien Roussel i Partisë Komuniste dhe Yannick Jadot i Të Gjelbërve.
Por të gjitha këto parti bashkë morën vetëm 12% të votave, ndërsa kandidati i ekstremit të djathtë, Eric Zemmour, mori 7,2% të votave.
Edhe pse Macron duket favorit në balotazh, sipas analistëve të politikës franceze, në raundin e dytë njerëzit votojnë atë që është më pak i urryer.
Në vitin 2017, Le Pen humbi në balotazh kundër Macron me një diferencë të madhe votash. Këtë vit, popullariteti i Macron duket në rënie, por pëlqimi i saj për Vladimir Putin – me të cilin ka edhe një foto nga një takim në Moskë – mund t’i heqë pikë, për shkak të luftës në Ukrainë.
Sidoqoftë, një sondazh i IFOP, i cituar nga CNN, thotë se ajo mund të marrë deri në 47% të votave në balotazhin e 24 prillit.
Gjithsesi sipas analistëve, ky rezultat në raundin e parë të zgjedhjeve ka të bëjë me faktin se Macron nuk bëri fushatë, pasi vëmendja e Presidentit francez ishte te lufta në Ukrainë. Por ajo që pohohet është se popullariteti i Macron është në rënie, ndëra le Pen nuk ka artikuluar tezat që konsideroheshin si gabim në 2017, si politikat e forta anti-emigracion apo daljen nga BE.
