“Nuk kam asnjë tendencë për të sulmuar ambasadorët që ndodhen në Tiranë, përfshi edhe ambasadoren e SHBA, Yuri Kim”, tha ish-Kryeministri Sali Berisha.
I pranishëm në emisionin “Politiko”, Berisha tha se është i papranueshëm qëndrimi i diplomates amerikane që angazhohet për të emëruar Kryetarin e PD, me qëndrimin e saj që tha se “njihte Enkelejd Alibeajn kryetar i PD”.
Berisha tha se i kanë kërkuar që të shtyjë për më vonë kandidimin për kreun e PD dhe kjo i është thënë nga një person, i cili vinte pas një takimi që kishte me ambasadoren.
“Erdhi dhe më tha: tërhiqu nga kandidimi, vendos kë të duash në krye të PD tani. I thashë vetëm fakti që po përpiqen të emërojnë kryetarin e opozitës, më shtyn që të kandidoj”, tha Berisha, duke rrëfyer detaje nga ajo që e ka konsideruar si një ofertë që i është bërë.
