Këngëtari i grupit “Elita 5”, Arif Ziberi ka mbështetur studentët e Fakultetit të Muzikës në Maqedoni, të cilët sot dolën në protestë kundër pedagoges Besiana Memhedi, të cilën e akuzojnë për fyerje, bullizëm sistematik dhe presion.
“Ky shqetësim ekziston që moti, unë jam në rrjedha. Dhe kam ardhur që ti përkrahi pasi çdo prind i sjell fëmijët me sakrifica e veta për të mësuar për të studiuar, por profesorja në fjalë me vite e ka në gjak maltretimin dhe ofendimin. Unë jam në rrjedha pasi e kam pasur fëmijën, tani e kam edhe fëmijën tjetër këtu në këtë fakultet dhe jam në rrjedha të gjithë këtyre fëmijëve që profesorja i bën ndaj fëmijëve”, ka thënë Ziberi.
Këngëtari Arif Ziberi tha se edhe ai është ankuar tek udhëheqësit e Fakultetit për ka hasur në dyer të mbyllura.
“Unë gjithashtu kam pasur problem me këtë profesoren për fëmijën tim e kam ngritur zërin, kam shkuar në fakultet e kam ngritur shqetësimin, kam hasur në dyer të mbyllura, nuk e di çka është puna, e kam pyetur veten vallë kaq i fortë është ky njeri mbi çdo ligj mbi çdo etik kjo. Kam pyetur edhe zyrtar edhe politikan se kush i qëndroj prapa. Por unë thjesht kam dal për ti përkrahë pasi që e di se të gjitha që i thonë këto studentë janë shumë të vërteta dhe njëherë e përgjithmonë duhet të gjërat të thuhen ashtu siç janë jo të lihen në harresë”, ka deklaruar këngëtari Arif Ziberi, raporton Alsat.mk.
Kujtojmë se këngëtarja e njohur, Besiana Mehmedi, njëherësh profesore në Fakultetin e Muzikës në Tetovë është bërë arsyeja përse prej javësh, studentët po e bojkotojnë lëndën e saj.
“Edhe pse ka vite që gjuha e profesoreshës inordinare Besiana Mehmedi ka qenë dhe vazhdon të jetë kundër çdo kodeksi etik të sjelljes, ditëve të fundit situata po bëhej gjithnjë më e padurueshme, sidomos me rastin e fundit ku reagimi në “Fejsbuk” i njërit prej studentëve në një postim, u bë “shkak” që kjo e fundit përdori një gjuhë që nuk i ka hije një profesoreshe si dhe kreu vepër penale duke e kërcënuar atë se “do e kap për fyti” dhe se me paralajmërimin se në të ardhmen duhet të “kemi kujdes si sillemi në Fejsbuk”, tha në protestë Ardi Lena, Student në Fakultetin e muzikës USHT.
