Deputetja demokrate Albana Vokshi publikoi sot denoncimin e një mësueseje nga Elbasani, sipas të cilës tezat e një provimi vlerësues për arsimtarët ishin publikuar me urdhër të ministres Evis Kushi, për të favorizuar ato që konsiderohen si “miq” të Rilindjes apo aktivistë të saj.
Pas publikimit të denoncimit, Kushi u shpreh se ishte e gatshme të largohej nga posti ministror, nëse provohej një akuzë e tillë, duke paralajmëruar një padi në Gjykatë ndaj deputetes së PD.
Por në një tjetër reagim, Vokshi shprehet se “në vend që të kërkojë ndjesë mësuesve e të marrë masat për këdo që ka nxjerrë tezat e provimit në emër të saj, ministrja e Arsimit, Evis Kushi, merr në mbrojtje shkelësit e ligjit e më kërcënon me padi në gjykatë”.
“E mirëpres padinë e Ministres Kushi, do ishte e pesta në rradhë pas padive të Edi Ramës, Erjon Veliajt, Taulant Ballës…
Znj. Ministre, mësues të ndershëm, të cilëve ju dhimbset arsimi denoncuan një veprim skandaloz që duhej ndalur.
Kishit rastin të distancoheshit nga ai, duke i kërkuar ndjesë cdo mësuesi që hyn në këtë provim e duke vënë para përgjegjësisë cdokënd që shkel ligjet, procedurat e rrjedhimisht edhe barazinë në një test të tillë të rëndësishëm duke favorizuar militantë partie, miq, patronazhistë etj etj.
Ju zgjodhët të mbronit shkelësit e abuzuesit e jo mësuesit.
Zgjodha të mos i publikoj tezat me shpresën e një reagimi ndryshe nga ana juaj.
Por tani jam e gatshme t’i dorëzoj ato në gjykatë.
Shihemi në gjykatë”, shkruan Vokshi në reagimin e saj.
