Nga Boldnews.al
“Ujë i çezmave është i pijshëm”. “Do të kemi ujë 24 orë në vitin 2020”. “Do të kemi ujë 24 orë në 2021, 2022, 2023…”. Këto premtime, të Lali Erit, apo edhe të politikanëve shqiptarë, janë dëgjuar pas vitit ’90.
Gjithkush ka premtuar ujë dhe drita 24 orë, por kur kanë kaluar vite me radhë, këto premtime kanë rënë “në vesh të shurdhër”. Asnjë politikan nuk i ka mbajtur, teksa janë shpenzuar qindra miliona euro në të gjithë Shqipërinë.
Por, “gangrena” ka qenë kryeqyteti, ku banorët janë tharë për pikën e ujit. Madje, paguajnë ujin e çezmave, ujin e pijshëm dhe ujë për të gatuar që e blejnë në markete. Por, në disa lagje, shkojnë edhe autobote “ujë Selite!”. Por, çfarë uji pijnë punonjësit e administratës shtetërore?! Apo ata që duhet t’u sjellin ujë banorëve? Sipas dokumenteve që disponon Boldnews.al, Bashkia e Tiranës ka hapur një tender për t’u blerë ujë të pijshëm punonjësve të saj.
Pra, nga njëra anë premtohet që uji i çezmave është i pijshëm dhe nga ana tjetër punonjësit e bashkisë duhet të blejnë ujin. Por, sërish në kurriz të taksapaguesve, të cilët po paguajnë që këta burokratë të mos paguajnë vetë ujin!
Sipas dokumenteve që disponon Boldnews.al, Bashkia e Tiranës ka hapur tenderin për procedurën e prokurimit me objekt “blerje ujë i pijshëm”, për punonjësit e Bashkisë Tiranë për vitin 2022″.
Njoftimi është dërguar në Agjencinë e Prokurimit Publik, teksa procedura është e hapur dhe e thjeshtuar. Fondi limit është 2.249.925 lekë pa TVSH, ndërsa kohëzgjatja e kontratës ose afati për zbatimin e saj është nga data e lidhjes së kontratës deri në fund të vitit 2022, sipas nevojave dhe kërkesave të Autoritetit Kontraktor.
Pra, përsa kohë që punonjësit do të jenë në zyrat e Bashkisë së Tiranës, do të pinë ujë të pijshëm nga shishe 19 litra që do vendosen në zyrat. Uji nuk do blihet me paratë e punonjësve, por me paratë e taksave të banorëve të Tiranës, të cilët e paguajnë ujin disa herë; në çezma, në markete, në autobote! Madje, ujë për të pirë, gatuar, larë…
Megjithatë, sipas dokumenteve, Bashkia e Tiranës kërkon që të blejë gota plastike dhe shishe me ujë 19 litërshe. Gjithsej do të blihen 5.385 copë shishe.
“Afatet e lëvrimit do të jenë nga data e nënshkrimit të kontratës, teksa operatori ekonomik fitues duhet të lëvrojë mallin sipas kërkesave dhe në datat e përcaktuara nga Autoriteti Kontraktor. Artikujt duhet të dorëzohen në magazinën e Bashkisë Tiranë nga lidhja e kontratës deri në fund të vitit 2022. Malli i prodhuar duhet të dorëzohet në magazinën e Bashkisë Tiranë”, thuhet në dokumente.
