Lulzim Basha, edhe pse u dorëhoq nga posti i kreut të PD, ndonëse ishte shkarkuan me vendimet e miratuara në Kuvendin e 11 dhjetorit, ka nisur një tur takimesh në zona të ndryshme të vendit me qytetarë dhe mbështetës të tij.
Takimin e fundit Basha e ka zhvilluar në Mat, ndërsa publikisht ka folur për bashkimin e demokratëve, por pa harruar sulmet dhe akuzat në drejtim të ish-Kryeministrit Sali Berisha.
“Ajo që dua të them është që unë po punoj e do punoj për një PD të bashkuar rreth vlerave mbi te cilat ajo është krijuar që të jetë alternativë për njerëzit”, theksoi Basha.
Kreu demokrat mësohet se në takimin e zhvilluar në Mat e ka cilësuar si një pushtim të selisë nga ana e Komisionit të Rithemelimit marrjen e zyrave, ndonëse Komisioni shkoi në seli pas vendimit të Gjykatës së Tiranës, që njohu Kuvendin e 11 dhjetorit. Basha mësohet se ka folur mbi ankimimin që është bërë kundër këtij vendimi, ndërsa i ka qëndruar tezës se me një person “non grata” PD nuk ka të ardhme.
