Kënga e Elgit Dodës “Fatal Love” është pëlqyer shumë, por vëmendje ka marrë edhe protagonistja e klipit, Dona Kodra e cila është motra e Saimir Kodrës.
Dona ka folur në një intervistë në “Ditë e re”, për herë të parë për bashkëpunimin me Elgitin dhe vëllain e saj, Saimirin. Dona u shpreh se kjo ishte hera e dytë, por e quajti të fundit që del në një videoklip.
“Ishte hera e dytë dhe e fundit. E para ishte me Young Zerkën. Bashkëpunimi me Elgitin ishte shumë i bukur. Nuk ishte e vështirë t’i qëndroja pranë Elgitit edhe pse është i martuar. Ma bëri shumë të thjesht. Një djalë shumë i mirë dhe punëtor”, tha ajo.
Për Saimirin, Dona tha se është shumë mbështetëse, por ka një natyrë të rreptë.
“Saimiri është shumë mbështetës. Ne e kuptojmë njëri-tjetrin shumë mirë. Është vetë artist dhe nuk ka si të më kundërshtojë. Kemi diferencë të madhe moshe. Kam dhe një motër tjetër të madhe. Saimiri është një natyrë e rreptë me të tjerët por me mua është një dashuri e vërtetë. Unë krenohem me atë, kam një mrekulli që ma ka falur Zoti por nuk e përmend shpesh sepse kam identitetin tim. Përveçse më ka hapur dyer nuk më ka mbyllur asnjë derë deri tani”, tha Dona.
Blogerja shtoi se ekranin e ka ëndërr dhe do donte një emision të përditshëm.
“E kam menduar të bëhem pjesë e ekranit dhe e kam vendosur si ëndërr në sirtar. Nuk më venitet si pasion por ndoshta nuk ka ardhur momenti i duhur. Do më pëlqente një emision mëngjesi, i përditshëm. Edhe pse gjumin e dashuroj“- tha ajo.
