Kombëtarja shqiptare U-16 për djem ka nisur ditën e djeshme përgatitjet për turneun UEFA Development U-16 që do të zhvillohet në vendin tonë në datat 9-14 prill. Nën drejtimin e trajnerit Ervin Bulku dhe stafit kuqezi, skuadra ka zhvilluar seancat e para stërvitore, ndërsa fshf.org i ka ndjekur nga afër. Dy prej futbollistëve të Kombëtares U-17, në një prononcim për Fshf.org nuk e fshehin kënaqësinë që kanë marrë ftesë të përfaqësojnë Shqipërinë në këtë turne, ku kuqezinjtë do të përballen me Irlandën e Veriut, Perunë dhe Luksemburgun, me ndeshjet që do të zhvillohen në QS Kamëz.
Lojtari kuqezi i Colombus Crew, John Jaku vlerëson grupin ku bën pjesë, ndërsa thekson se skuadra i ka të gjitha mundësitë ta fitojë këtë turne. “Jam shumë i kënaqur që do të luaj për Kombëtaren e Shqipërisë. Kam dashur gjithë jetën të luaj për këtë ekip, që kur kam qenë 4 vjeç e kam nisur të luaj futboll, ëndrra ime ka qenë të luaj për këtë Kombëtare dhe ekipin e parë. Emocione që vesh këtë fanellë? – Prindërit e mi kanë qarë, më duket sikur jam në ëndërr.
Grupi i kuqezinjve? – Skuadër shumë e mirë dhe kemi mundësi të shkojmë larg me këta çuna. Kemi tre ndeshje të forta, po me këtë skuadër kemi mundësi t’i fitojmë të treja”, – tha Jaku për fshf.org.
Ndërkaq, futbollisti shqiptar i Sudtirol, Dean Vranici ndihet i lumtur që ka marrë sërish një ftesë për të qenë pjesë e Kombëtares, teksa ashtu si Jaku, edhe ai sheh një grup të mirë dhe skuadra mund t’ia dalë të marrë rezultate të mira në këto sfida.
“Ndihem shumë mirë dhe jam shumë krenar që jam këtu dhe që sot vesh këtë fanellë. Falënderoj të gjithë ata njerëz që më kanë dhënë besim dhe që më kanë parë në Itali, aty ku unë luaj. Unë do jap maksimumin në stërvitje dhe në ndeshje. Ftesa nga Kombëtarja? – Sa e mora vesh njoftova menjëherë babin, pasi edhe ai e ka pasur ëndërr që unë të luaj për këtë skuadër, sepse edhe ai ka luajtur vetë. Shumë i kënaqur që më kanë thirrur sërish, pasi është një skuadër shumë e mirë dhe mund të ecë shumë përpara. Të gjithë lojtarët kanë cilësitë e tyre dhe janë përzgjedhur sepse ka një motiv dhe jam shumë i bindur që kjo skuadër mund të ecë shumë përpara. Kundërshtarët? Mund të marrim rezultate shumë të mira kundër këtyre skuadrave.
Synimet për të ardhmen – Ëndrra ime është të luaj në skuadrën A dhe sigurisht që kërkon impenjim, stërvitje, stërvitje dhe vetëm stërvitje. Më pas është vendim i trajnerit”, – thotë Vranici për fshf.org.
