Ambasadorja amerikane Yuri Kim duket se po përfshihet në negociatat e pritshme mes Partisë Socialiste dhe deputetëve të opozitës për zgjedhjen e Presidentit të ri të vendit.
Sot diplomatja amerikane zhvilloi një takim 70 minutësh me Enkelejd Alibeajn, i cili mban postin e kreut të Grupit Parlamentar të PD, ndërsa me një postim në Twitter, ajo bën të ditur se e njeh edhe si kryetar të PD-së, edhe pse ka një vendim Gjykate që njeh Komisionin e Rithemelimit si strukturën drejtuese të partisë më të madhe të opozitës.
Takimi me Alibeajn u zhvillua në zyrën e tij në Kryesinë e Kuvendit, atje ku një ditë më parë diplomatja amerikane u takua edhe me Kryeparlamentaren Lindita Nikolla.
Ndërkohë nesër (e mërkurë) rreth mesditës, diplomatja amerikane do të takohet me Taulant Ballën, kreun e Grupit Parlamentar socialist dhe një nga 3 të mandatuarit e PS për zhvillimin e negociatave me deputetë apo grupet parlamentare lidhur me zgjedhjen e Presidentit.
Me takimin e nesërm me Ballën duket se Kim ezauron bisedimet në nisel parlamentar me drejtuesit e grupeve më të mëdha parlamentare, por edhe me Kryeparlamentaren, edhe pse me këtë të fundit sipas një njoftimi zyrtar nga Kuvendi, e vetmja çështje e cila nuk ishte diskutuar ishte ajo për Presidentin.
Burime diplomatike shprehen se ambasadorja amerikane është angazhuar në procesin e negociatave, edhe pse duket qartazi se Enkelejd Alibeaj, pavarësisht se njihet si drejtues i grupit parlamentar, nuk gëzon mbështetjen e shumë prej deputetëve demokratë, përtej atyre që janë identifikuar si mbështetës të Komisionit të Rithemelimit.
Një ditë më parë mediat njoftuan një takim mes Alibeajt dhe 3 negociatorëve socialistë, Taulant Ballës, Damian Gjiknurit dhe Elisa Spiropalit, edhe pse zyrtarisht asnjë nga deputetët nuk e konfirmoi. Gjithsesi disa orë më pas, përmes rrjeteve sociale, Spiropali konfirmoi nisjen e negociatave për zgjedhjen e Presidentit, por shtoi se nga ky proces përjashtohej Sali Berisha.
Ish-Kryeministri ka deklaruar se opozita nuk do të mbështesë një kandidat për President të propozuar nga Edi Rama dhe ka akuzuar këtë të fundit se po tenton të blejë deputetë të opozitës.
