Ministri i Jashtëm rus Sergei Lavrov, ka akuzuar Perëndimin se po përpiqet të prishë negociatat mes Moskës dhe Kievit.
Sipas ministrit rus, po nxiten inskenimet lidhur me vrasjet e civilëve në Bucha.
Zyrtarët ukrainas dhe vendet perëndimore kanë deklaruar se ka prova që Rusia ka kryer krime lufte.
Nga ana e saj Moska i ka mohuar këto akuza , duke i konsideruar si inskenime.
Lavrov tha sot se varret masive të zbuluara në Bucha janë një “provokim” që ka si qëllim të pengojë bisedimet paqeruajtëse midis Rusisë dhe Ukrainës, raporton AFP.
Në një video-mesazh të transmetuar në televizionin rus, Lavrov tha:
“Lind një pyetje: Për çfarë qëllimi shërben ky provokim i pavërtetë? Ne jemi të shtyrë të besojmë se është gjetja e një preteksti për të prishur negociatat në vazhdim.”
Lavrov shtoi se situata në Bucha, të cilën shumë e quajnë dëshmi të krimeve të luftës të kryera nga Rusia, ka për qëllim që të “shpërqendrojë vëmendjen nga procesi i negociatave, të shkëpusë vëmendjen nga fakti se pala ukrainase, pas Stambollit, ka filluar të tërhiqet.
Bisedimet midis Rusisë dhe Ukrainës kanë vazhduar pasi diplomatët e lartë nga të dy vendet u takuan muajin e kaluar në Turqi
Nga ana e tyre zyrtarët ukrainas dhe vendet perëndimore kanë thënë se kanë prova se Rusia ka kryer krime lufte, shkruan BBC.
Por Moska mohon akuzat e Ukrainës, duke i quajtur ato “falsifikime monstruoze”, raporton agjencia shtetërore ruse e lajmeve RIA.
Gjykata Ndërkombëtare Penale tashmë ka filluar hetimin nëse po ndodhin krime lufte në Ukrainë.
