Banorët e Laprakës, Paskuqanit dhe Kodrës së Priftit vijojnë të enden dyerve të institucioneve shtetërore, duke kërkuar legalizim e dëmshpërblim për banesat e tyre, që parashikohen të shemben në kuadër të projektit të Unazës së Madhe.
Disa banorë kanë shkuar në zyrat e ARRSH-së këtë të Martë. Duke biseduar me një përfaqësues të Autoritetit Rrugor, banorët kërkuan dëmshpërblim për objektet e palegalizuara që preken nga projekti, njëlloj si për ato të legalizuara. Po ashtu, hodhën akuza për legalizime selektive.
Në një video të publikuar, dëgjohet përfaqësuesi i autoritetet që thotë se ARRSH po vepron sipas parashikimit të ligjeve në fuqi.
Më pas, banorët janë drejtuar për te zyra e Artan Lames, kreut të Kadastrës – institucioni që kryen legalizimet e objekteve.
Teksa kërkuan një takim me Artan Lamen, banorët hodhën akuza ndaj tij, duke e quajtur të korruptuar.
“O drejtor, hajt të jap një kafe 15 mijë euro, hajde të paguaj legalizimin 15 mijë euro, ti jap në dorë”, u shpreh një banore.
“O i korruptuar, dil jashtë. Shtëpia ime ishalla të ngel në fyt“, tha një tjetër.
“O Artan po dil zbato ligjin, kaq e thjeshtë është“, tha gazetari Bledian Marku, banesa e të cilit po ashtu preket nga projekti.
“Dil se me taksat tona paguhesh”, dëgjohet të thotë një tjetër.
Pas thirrjeve të qytetarëve, Lame ka pranuar të takojë një përfaqësi të qytetarëve.
