Talo Çela është sot një nga personat më të kërkuar nga Policia e Shtetit, ndërsa ish-miku i tij, Nuredin Dumani, u arrestua pak ditë më parë në një operacion të forcave RENEA, zhvilluar në qytetin e Fierit, pak orë pas pritës që i ishte organizuar në Papër të Elbasanit.
Ndërkohë mediat raportojnë sot se më 29 mars, ditën e atentatit ndaj Dumanit, Talo Çela ka qenë duke pirë kafe i pashqetësuar në një lokal, buzë rrugës Elbasan – Prrenjas.
Sipas raportimeve mediatike, prania e të shumë kërkuarit për disa vrasje dhe grabitjen e Rinasit, është vërtetuar edhe nga kamerat e sigurisë, të cilat janë sekuestruar nga policia.
Në pamjet filmike rezulton se i shumëkërkuari rreth orës 17:35, kohë kur u sulmua me armë Dumani në Papër, ishte nën shoqërinë e dy personave të tjerë, në një lokal në fshatin Xhyrë.
Edhe pse aksi rrugor Elbasan – Prrenjas është një nga akset më të survejuara nga ana e policisë, Talo Çela lëviz lirshëm dhe i pashqetësuar. Zyrtarisht policia ka bërë disa aksione për arrestimin e tij, por të gjitha operacionet kanë dështuar.
