Makina e Iljaz Çalit, 37-vjeçarit që u vra mbrëmë në autostradën Tiranë – Durrës, është dërguar në Drejtorinë e Policisë së Tiranës.
Ngjarja ka ndodhur rreth orës 22:30 minuta në rrugën dytësore, paralel me autostradën Tiranë – Durrës.
Persona të paidentifikuar qëlluan në drejtim të një makine tip “Land Rover” të marrë me qira në Rinas nga viktima, kurse rruga ka qenë në errësirë totale.
Nuk përjashtohet mundësia që në mjet të ketë qenë edhe një person tjetër, për shkak se dera e pasagjerit ka qenë e hapur.
Çali rezulton emër i njohur për policinë. Më 2 korrik të 2016-ës, pas grabitjes së parë të parave në Aeroportin e Rinasit, policia ka ushtruar kontroll në të gjitha banesat e të dyshuarve.
Teksa ka kontrolluar banesën e Çalit, ka gjetur 682 rrënjë kanabis. Policia për këtë rast vuri në pranga Xhemile Çalin, si dhe shpalli në kërkim djalin e saj, i cili u arrestua më vonë.
