Kryeministri Edi Rama ka qenë ndër të parët që ka uruar Aleksandar Vuçiç për fitoren në zgjedhjet e djeshme presidenciale.
Zyra e shtypit e Kryeministrisë nuk ka shpërndarë mesazh urimi të Ramës për Vuçiç, por është gazeta serbe, Kurir, media e kontrolluar nga presidenti serb, që e konfirmon një gjë të tillë.
Gazeta e Beogradit shkruan:
“Urime nga Hungaria u dërguan nga presidenti Katalin Novak dhe kryeministri Viktor Orban, dhe në emër të Republikës së Sllovenisë nga presidenti Borut Pahor dhe kryeministri Janez Jansha. Presidenti Vuçiç ka pranuar urime edhe nga kancelari i Republikës së Austrisë, Karl Nehamer, nga kryeministri i Republikës së Shqipërisë, Edi Rama, si dhe nga kryeministri i Republikës së Maqedonisë së Veriut, Dimitar Kovaçevski. Urimet në emër të mbretit të Bahreinit u dërguan nga Sheikh Nasser bin Hamad bin Isa al Khalifa. Edhe anëtari serb i Presidencës së Bosnje-Hercegovinës, Milorad Dodik, ka uruar presidentin Vuçiç dhe fitoren e tij në zgjedhje”.
Gjithashtu, Kurir shton se mes të tjerësh, Vuçiç ka marrë mesazhe urimi edhe nga Presidenti i Republikës franceze Emanuel Macron, Presidenti i Federatës Ruse, Vladimir Putin, etj.,
Vuçiç u shfaq populist gjatë fushatës elektorale, teksa përdori të njëjtën metodë si edhe në të kaluarën.
Ai premtoi rroga dhe pensione më të larta si dhe hov të ri ekonomik. Agresioni ushtarak rus kundër Ukrainës bëri që këshilltarët e tij të zgjedhin moton “Paqe dhe stabilitet”.
Vuçiç e inskenoi veten si spirancë stabiliteti në kohë të pasigurta. Gjithashtu, gjatë fushatës, Aleksandar Vuçiç deklaroi se do të jepte dorëheqje nga kryetar i Partisë Përparimtare Serbe.
