Në disa qarqe të vendit janë paraqitur probleme për shkak të motit të keq që ka përfshirë vendin gjatë ditëve të fundit.
Bulqiza është përfshirë nga reshje shiu dy ditët e fundit, ndërsa reshjet e dëborës kanë nisur në lartësinë 500 metra mbi nivelin e detit në qytet.
Shumë fshatra të thella në njësisë administrative Martanesh, Zerqan, Ostren, Trebisht janë mbuluar nga dëbora. Probleme ka pasur në linjat e transmetimit të tensionit të mesëm dhe atë të ulët në zonat e thella.
Edhe në qarkun e Korçës paraqitet e njëjta situatë. Mësohet se zonat në lartësinë mbi 1 mijë metër mbi nivelin e detit janë zbardhur nga reshjet. Dëbora ka krijuar vështirësi në qarkullimin e mjeteve.
Reshje me intensitet më të larte ka pasur në aksin rrugor që lidh Boboshticën me Dardhën, ku trashësia ka shkuar në 10 cm. Vithkuqi, Shtylla e Voskopoja janë përfshirë nga reshjet e dëbirës gjithashtu.
I gjithë segmenti i rrugës Kukës-Shishtavec që përshkon Grykën e Vanave ka rrëshqitje masive guresh. Meterologia, Lajda Porja është shprehur se ditët në vijim do të jenë gjithashtu të ftohta e me reshje shiu e dëbore.
Proja shprehet se reshjet kanë qenë të përqendruara në zonat veriore dhe verilindore duke sjellë prurje të shumta në liqenin e Fierzës, Vaut të Dejës dhe Komanit, të cilat ishin të domosdoshme. Sipas meteorologes, intensiteti do të jetë më i lartë në zonat veriore dhe verilindore.
