Presidenti Ilir Meta ka reaguar për masakrën e ushtrisë ruse në Bucha të Ukrainës, ku me dhjetëra civilë të pafajshëm u gjetën të vrarë rrugëve të qytetit.
Në një postim në faqen e tij në Facebook, Kreu i Shtetit shkruan se civilët e masakruar, varret masive dhe përdhunimet janë evidenca të pakundërshtueshme të gjenocidit që Rusia po zbaton në Ukrainë.
Sipas Metës, krimet kundër njerëzit të kryera nga Rusia dhe që po tmerrojnë mbarë njerëzimin duhet të hetohen si të tilla. Presidenti thekson se Shqipëria do të japë kontributin e saj në këtë drejtim.
“I shokuar nga mizoritë e ushtrisë ruse në Bucha dhe rajone të tjera të Ukrainës. Civilët e masakruar, varret masive dhe përdhunimet janë evidenca të pakundërshtueshme të genocidit që Rusia po zbaton në Ukrainë. Bashkësia ndërkombëtare duhet të shumëfishojë përpjekjet për të ndaluar makinerinë vrasëse të Kremlinit.
Krimet kundër njerëzimit të kryera nga Rusia dhe që po tmerrojnë mbarë njerëzimin duhet të hetohen si të tilla. Si vend anëtar jo i përhershëm i Këshillit të Sigurimit të OKB-së dhe si vend anëtar i NATO-s, Shqipëria do të japë kontributin e saj në këtë drejtim”, shkruan Meta.
