Një ditë më parë u raportua se grupi që mbështet Lulzim Bashën ka nën kontroll rrjetet sociale që kanë emrin zyrtar të Partisë Demokratike, ndërsa Komisioni i Rithemelimit që prej vendimit të Gjykatës së Tiranës, ka marrë në dorëzim selinë.
Por dita ditës zbulohen detaje të reja, pasi grupimi i Lulzim Bashës i ka lënë në dorëzim Komisionit të Rithemlimit zyrat e boshatisura, duke marrë që andej edhe gjithë arkivën dhe database-n e anëtarëve.
Burime nga Komisioni i Rithemelimit pohojnë se kompjuterat ku ndodheshin emrat e anëtarëve të PD janë marrë nga ata që njihen si pjesëtarë të grupimit të Lulzim Bashës. Në 2017 nisi procesi i dixhitalizimit të anëtarësisë, duke nxjerrë edhe kartat e reja, të cilat përmbajnë edhe të dhënat sensitive të qytetarëve, përfshi kartën e identitetit, vendin e punës, numrin e telefonit. Të gjitha këto të dhëna sot ndodhen në duart e grupimit Basha, që para se Komisioni i Rithemelimit të hynte në seli, kanë mundur të heqin nga godina kompjuterat me emrat e anëtarëve, pra të gjithë database-n me çdo të dhënë.
Nuk dihet nëse Komisioni i Rithemelimit do të arrijë të marrë në dorëzim sërisht të dhënat, por ajo që dihet është se anëtarët janë lutur që të plotësojnë formularë të rinj, duke bërë kështu nisjen e një procesi të ri regjistrimi.
E gjitha kjo duket se ka krijuar një amulli, ndërsa Komisioni i Rithemelimit ka të skanuar vetëm ata anëtarë që morën pjesë në referendumin e 18 dhjetorit 2021, ditë kur me votën e tyre legjitimuan vendimet e Kuvendit të 11 dhjetorit.
