Një person është arrestuar dhe një tjetër është shpallur në kërkim lidhur me shpërthimin e djeshëm në Lezhë.
Policia njoftoi këtë të Shtunën vënien në pranga të Sokol Pepushit, 36 vjeç, banues në Lezhë, si dhe shpalljen në kërkim të Admir Zogajt, 46 vjeç, banues në Manati, Lezhë.
I pari akuzohet se nuk ka kallëzuar për ngjarjen, ndërsa Zogaj sipas hetimeve të deritanishme, i ka hedhur një granatë Pepushit për ta vrarë.
“Ditën e djeshme, rreth orës 13:00, në afërsi të një restoranti në lagjen ‘Besëlidhja’, Admir Zogaj ka hedhur një ndezës granate në drejtim të shtetasit Sokol Pepushi, e cila ka shpërthyer pa shkaktuar dëme në njerëz. Pas kësaj ngjarjeje, shtetasi Sokol Pepushi është larguar pa njoftuar Policinë. Vijon puna për kapjen e shtetasit Admir Zogaj”, thuhet në një njoftim të policisë.
Zogaj akuzohet për veprat penale “Vrasja me dashje”, e mbetur në tentativë dhe “Mbajtja pa leje dhe prodhimi i armëve shpërthyese dhe i municionit”.
Ndërsa Pepushi për “Moskallëzimi i krimit”.
Mbeten ende për tu zbardhuar arsyet pse Admir Zogaj donte të vriste Sokol Pepushin.
