Prej disa ditësh në media qarkullon një informacion, sipas të cilit Lulzim Basha, mund të jetë një nga kandidatët për President të ri të vendit.
Vetë Basha nuk ka reaguar lidhur me lajmet, pra as e ka mohuar dhe as e ka pohuar, ndërsa Partia Socialiste në anën tjetër ka nisur atë që e konsideron si procesin e negociatave me deputetë dhe grupe parlamentare, për kandidatët e mundshëm.
Në deklaratat publike socialistët janë shprehur se do të donin një figurë që qëndron mbi forcat politike, ose një President që mos e ketë mendjen te krijimi i partive.
Deputeti demokrat Ervin Salianji, në një reagim për Koha Jonë, thotë se “lajmi që qarkullon gjërësisht në media prej ditësh dhe është lajm shqetësues për çdo opozitar në këtë vend!”
“Për ish drejtuesin e PD-së që ka marrë gjithçka nga demokratët ishte detyrim ta përgënjeshtronte menjëherë. Ky lajm përforcon perceptimin që gjithçka luhet për interesa personale të tij dhe për fat të keq përforcon perceptimin që luhet me sakrificën e demokratëve duke i shitur më pas tek Rama, siç për fat të keq janë “lëshuar” shumë kauza dhe janë hedhur tej shumë bashkëpunëtorë!
Politika konstruktive nuk është shitja e opozitës, por opozita e fortë, pa kompromise personale. Gjithçka për interes të qytetarëve është politikë konstruktive.
Natyrisht as që mendohet ta votoj!”, tha ai.
