Lëvizja Socialiste për Integrim ka reaguar pas arrestimit të ish- deputetit Alqi Bllako.
LSI thotë se Policia e Shtetit vonoi për të arrestuar ish-deputetin e korruptuar, dhe se iu deshën kohë që të negociojë mbylljen e pazarit të dorëzimit të deputetit të korruptuar dhe jo kryerjen e mënjëhershme të arrestimit të tij.
“Të nderuar qytetarë, afera më e madhe e pluralizmit ajo e inceneratorëve vazhdon të thellohet. Edhe përpjekja më e fundit për të shpërqendruar vëmendjen është një përpjekje e dështuar. Asnjë shqiptar nuk habitet më, që Policia e Shtetit arreston në mes të natës në banesë qytetarët e thjeshtë se protestojnë, por ndërkohë i duhen orë të tëra që të negociojë mbylljen e pazarit të dorëzimit të një deputeti të korruptuar dhe jo kryerjen e menjëhershme të arrestimit të tij. Asnjë tentativë e tillë nuk mundet të tërheqë vëmendjen nga përgjegjësit e vërtetë të kësaj mega vjedhjeje. Edi Rama, Erion Veliaj, Ëngjëll Agaçi, Damianin Gjiknuri, Arben Ahmetaj, Armando Subashi. Çdo vonesë nga ana e SPAK për vënien para përgjegjësisë penale të autorëve dhe ideatorëve të kësaj skeme vetëm sa e rëndojnë pozitën e SPAK dhe nuk zbardh të vërtetën para qytetarëve. Faktet tashmë janë të njohura për të gjithë shqiptarët dhe fakte të tjera kanë dalë dhe do vijojnë të dalin. Drejtësia me regji, e cila ka prej më shumë se një viti që qëllimisht zvarrit dhe nuk vepron ka bërë që inceneratori i Tiranës të vazhdojë të paguhet me pagesa shumë milionëshe në llogari të pronarëve mafiozë në arrati. SPAK, me mosveprim në vend që të zbardhë e thellon skandalin”, thuhet në reagimin e Endrit Braimllarit, Sekretarit të Përgjithshëm të LSI.
“Përgjegjësit shtetëror dhe kompanitë e pastrimit të parave janë të gjithë të lirë gjithashtu dhe pronarët e inceneratorëve në arrati vazhdojnë të paguhen me miliona nga qeveria e rilindjes ndërkohë që për shqiptarët nuk ka para për t’i kompesuar për çmimet e ushqimeve dhe karburantit. I kërkojmë SPAK-ut të lërë mënjanë drejtësinë me regji dhe të veprojë në mënyrë të menjëhershme mbi Edi Ramën Erion Veliaj për të zbardhur deri në fund këtë aferë”, vijon reagimi.
