Enkelejd Alibeaj, kreu i grupit parlamentar demokrat, ka thirrur sot mbledhjen e grupit parlamentar. Mbledhja – e para pas vendimit të gjykatës që njohu vendimet e Kuvendit të 11 Dhjetorit – pritet të nisë në orën 09:00, pak para nisjes së seancës plenare, në selinë blu.
Ish-kryeministri Sali Berisha tha dje se do të jetë në mbledhje dhe pse nuk ka marrë ftesë. Berisha u shpreh se ata nuk janë një grup parlamentar i ndarë.
“I pari që do të jetë në atë mbledhje është Sali Berisha. Sali Berisha ka një detyrim madhor absolut nga Kuvendi i 11 dhjetorit, të konfirmuar me referendumin e 18 dhjetorit dhe me zgjedhjet e 6 marsit. “Grupi parlamentar demokrat nuk është i ndarë. Më kanë njoftuar kolegët e mi se kanë mbledhje dhe unë do shkoj, është normale”, tha Berisha.
Pas kësaj deklarate reago deputeti Gazment Bardhi, i cili u shpreh se një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike.
“Askush nuk duhet ti imponohet apo injorojë mendimin e Grupit Parlamentar, kjo është përdhosje e dinjitetit të çdo deputeti. Deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur nongrata nga SHBA duhet apo jo të jetë pjesë e grupit. Deri atëherë askush nuk mund të imponohet. Çdo sjellje tjetër që i imponohet me kokëfortësi grupit parlamentar, pa pyet dhe duke e injoruar atë, është e papranueshme dhe jo demokratike”, u shpreh Bardhi.
