SPAK ka urdhëruar arrestimin e disa zyrtarëve dhe administratorëve në kuadër të hetimeve që po kryen lidhur me aferën e inceneratorëve. Mes të arrestuarve është edhe ish-ministri Lefter Koka, ndërsa për Alqi Bllakon, i cili sot dorëzoi mandatin e deputetit, pritet arrestimi.
Kryeministri Edi Rama tha se të gjithë këta persona janë të pafajshëm deri kur drejtësia të thotë fjalën e saj të fundit.
“Sot që flasim, përgjigja ime është si gjithmonë një përgjigjie në parim. Në rastin konkret dhe në të gjitha rastet, këtë nuk e caktoj as unë dhe as ju. Këtë e cakton drejtësia dhe deri kur të thuhet fjala e fundit, këta njerëz janë të pafajshëm.
Në regjime totalitare është ndryshe, bëhen gjyqe popullore dhe tribuna. Këtu ndryshimi është se sot për shkak të reformës në Drejtësi, kemi arritur në pikën ku nuk ka mburoja politike kundër drejtësisë. Por në pikën ku njerëzit të shfaqen fajtorë në mikrofone nuk jemi. Unë nuk jam as prokuror dhe as gjykatës”, tha ai.
