Ish-Kryeministri Sali Berisha deklaroi sot se do të merrte pjesë në mbledhjen e Grupit Parlamentar demokrat të thirrur nga Enkelejd Alibeaj.
Por menjëherë pas kësaj deklarate ka reaguar deputeti Gazment Bardhi, i cili shprehet se një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike.
“Askush nuk duhet ti imponohet apo injorojë mendimin e Grupit Parlamentar, kjo është përdhosje e dinjitetit të çdo deputeti.
Deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur nongrata nga SHBA duhet apo jo të jetë pjesë e grupit. Deri atëherë askush nuk mund të imponohet.
Çdo sjellje tjetër që i imponohet me kokëfortësi grupit parlamentar, pa pyet dhe duke e injoruar atë, është e papranueshme dhe jo demokratike”, shprehet Bardhi.
Me 9 shtator, me një vendim personal, Lulzim Basha vendosi që Sali Berisha të mos ishte pjesë e Grupit Parlaentar të PD, gjë që solli reagimin e ish-Kryeministrit që ndërmorri turin e takimeve me bazën demokrate. Pas muajsh përballjes dhe përplasjesh, Basha me një tjetër vendim përjashtoi përjetë Berishën nga PD, por Gjykata e Tiranës me një vendim të saj me 25 mars, legjitimoi Kuvendin Kombëtar të anëtarësisë i mbledhur me 11 dhjetor, në të cilin u rrëzuan të gjitha vendimet e marra nga Basha, si dhe u shkarkuan nga funksionet partiake jo vetëm Lulzim Basha por e gjithë kupola drejtuese e PD.
