Drejtori i Policisë së Shtetit Gledis Nano ka dalë në një konferencë të jashtëzakonshme për mediat në orën 01:00 të mëngjesit të së mërkurës.
Nano ka dhënë detaje nga arrestimi i të shumëkërkuarit Nuredin Dumani si dhe të një personi tjetër që ndodhej bashkë me të në momentin e arrestimit.
“Në 29 Mars në orën 22:25 u bë lokalizimi dhe arrestimi i një prej personave më të rrezikshëm, Nuredin Dumani. Në operacion u aktivizuan forcat speciale RENEA, Policia e Elbasanit dhe Policia e Fierit
U bë e mundur kapja e shtetasit H.H 40-vjeç, banues në lagjen Apolonia, u kap me një armë në brez. Gjithashtu, gjatë kontrollit në apartament u sekuestrua një armë kallashnikov.
Në orën 17:35 në Papër është qëlluar me armë zjarri në drejtim të mjetit BMW ku dyshohet se udhëtonte një shtetasi i kërkuar. Pas lokalizimit u arrit dhe u kap Nuredin Dumani. Në momentin e kapjes ishte i plagosur me armë zjarri. Pas ndihmës në Spitalin e Fierit, u dërgua në Tiranë. Janë sekuestruar dy armë zjarri pistoletë, kallashnikov dhe municion”, tha Nano.
Nano tha se hetimi vazhdon për të gjithë ngjarjen dhe nuk mund të japë detaje të mëtejshme.
Lidhur me ngjarjen foli dhe prokurori i Elbasanit, Kreshnik Ajazi, i cili tha se gjithçka është ende nën hetim.
