Shqiptari Ilir Leba, që akuzohet se vrau me thikë në Firenze agjentin imobilar italian Tommaso Dini, ka dalë përpara gjykatës.
Mediat në Itali shkruajnë se Leba nuk ka folur as edhe një fjalë përpara trupës gjykuese. Ai nuk ka pranuar të thotë arsyet përse vrau Dinin.
Në fund të seancës të mbajtur, gjykata la në burg Ilir Lebën, 48 vjeç.
Si ndodhi ngjarja
Viktima ishte agjenti imobilar Tommaso Dini 50-vjeç. Ai është goditur disa herë me thikë gjatë natës së të shtunës.
Pasi ishte goditur me thikë nga biznesmeni shqiptari, agjenti u shtrua në spital, por nuk mundi t’u mbijetojë plagëve të rënda që kishte marrë.
Ata që kanë qenë dëshmitarë të ngjarjes kanë thirrur menjëherë ndihmën e policisë. Burri kishte lëndime në gjoks dhe këmbë kur mbërriti në spital. Më pas ishte një operacion delikat, i cili u zhvillua mëngjesin e së dielës, por pavarësisht kësaj 50-vjeçari italian ndërroi jetë.
Në të kaluarën duket se ka pasur mosmarrëveshje në vendin e punës mes agresorit dhe viktimës. I arrestuari banues në Scandiçi është murator dhe ortak në një kompani ndërtimi së bashku me vëllain e tij. Debatet kanë çuar deri në vrasjen e italianit.
