Vllaznia ka vijuar me përgatitjet për fundin e sezonit. Pas pauzës së Superligës, tanimë skuadrat do përgatiten për ndeshjet gjysmëfinale të Kupës së Shqipërisë.
Shkodranët kanë një detyrë të vështirë të enjte, teksa në “Elbasan Arena” luajnë me Partizanin në 17:45. Skuadrat kërkojnë të vijojnë në Kupë, me objektivin Evropë që mund të arrihet edhe nga ky kompeticion.
Për të mbështetur të tijtë, në stërvitjen e sotme të Vllaznisë ishte edhe presidenti Alban Xhaferi, që iu ka dhënë një motiv më shumë djemve të Elvis Plorit.
“Ekipi i Vllaznisë ka vijuar edhe sot përgatitjet për ndeshjen e Kupës së Shqipërisë ndaj Partizanit. Pranë tij ka qenë edhe presidenti Xhaferi i cili po i qëndron shumë afër stafit teknik dhe futbollistëve duke kërkuar njëkohësisht prej tyre angazhim maksimal në këtë fundsezoni, për arritjen e objektivave që klubi ka vënë”, njoftojnë shkodranët.
