Partia Socialiste njoftoi sot se ka mandatuar Taulant Ballën, Elisa Spiropalin dhe Damian Gjiknurin, për nisjen e negociatave me grupet parlamentare dhe deputetët për zgjedhjen e Presidentit të ri.
Vendimi u bë publik nga kreu i Grupit Parlamentar socialist, Taulant Balla, pas një mbledhjeje të zhvilluar sot.
Balla tha sot se “do të kemi një president me të mirë se sa ky që kemi sot”.
Ndërkohë në një kryeartikull të gazetës “Koha Jonë” e botues Nikoll Lesin, shkruhet se informacione jo shumë të besueshme, porse nga kampi socialist kanë dalë si thashethemnajë, flasin se një nga kandidatët për President do të jetë Lulzim Basha.
“E kjo lojë, nëse “thashethemnaja” është direkt nga burimi i Surrelit, krijon një përçarje afatgjatë në PD dhe në opozitë. Por sidomos në PD, pasi sapo Berisha mori vendimin gjyqësor e po rreket të përbashkojë krejt demokratët, duke filluar stinë protestash popullore.
Futja e Bashës në këtë kandidaturë presidenciale forcon krahun e tij në PD, pasi vula dhe sigla, në gjykatën e apelit është e sigurtë se do t’ja heqin ish-kryeministrit. Kjo duke ditur se si funksionon drejtësia e “pavarur” në Shqipëri.
Pra nëse disa deputetë të PD filluan të luhaten kah Berisha, sapo të projektohet Lulzim Basha si President, menjëherë e dredhin dhe rrijnë prapë të “stani” i Enkeled Alibeajt dhe Gazmend Bardhit.
Berisha, sido të forcohet dhe ka besueshmeri tek demokratët, prapë nuk e rrëzon dot i vetëm kryeministrin Rama. Një përbashkim i madh opozitar me një Lul Bashë të djegur mund të jetë rrezik për pushtetin e Ramës.
Ndaj “thashethemnaja” e dalë sot nga kryeministria nuk është pa një të vertetë, sepse kështu forcon pushtetin e tij Edi Rama dhe ambasada amerikane nuk del zbuluar në investimin e saj anti-Berishë.
Edi Rama nuk të jep apo të fal kot pushtet nëse nuk i dalin llogaritë e tij personale.
Natyrisht një Bashë president do të jetë i mirëkontrolluar nga pushteti dhe nga amerikanët.
Nëse reagimet në PS mund të jenë të forta nga grupi parlamentar socialist që të mos zgjedhin Bashën, atëhere skema rezervë mbetet Jorida Tabaku”, shkruan Koha Jonë.
