Pas Tepelenës, ish-Kryeministri Sali Berisha ka udhëtuar drejt Përmetit, ku ka zhvilluar takimin e rradhës me anëtarësinë e Partisë Demokratike, në kuadrin e procesit të bashkimit të partisë.
Berisha është pritur me ovacione nga demokratët e Përmetit, aq sa ka emocionuar edhe ish-Kryeministrin.
Ai ka vënë theksin te bashkimi i demokratëve, për tu organizuar sa më shpejt, sikundër u shpreh, në përballjen me regjimin e Edi Ramës.
Berisha tha se shqiptarët do të mbushin sheshet dhe rrugët kundër regjimit, duke shtuar se kjo qeveri nuk meriton të qëndrojë në pushtet as edhe një ditë të vetme.
“Ky qytet ka traditën më të mirin në mendimin politik shqiptar, është kënaqësi e veçantë që vij në Përmet dhe ju gjej të bashkuar, ju me mençurinë tuaj lexuat mesazhin e 6 marsit, mesazh i të cilit ishte bashkimi, bashkimi dhe vetëm bashkimi, për një Parti Demokratike si opozitë e vërtetë shqiptare”, tha Berisha. Ai shtoi se do të ngrihemi si opozita më e fuqishme, për të shpëtuar Shqipërinë nga regjimi i bazuar te krimi, vjedhjen e shqiptarëve dhe detyrimin e tyre për tu larguar nga Shqipëria.
“Do përballemi me regjimin dhe këtë mision do e përmbushim duke u bashkuar, duke qëndruar të pamposhtur si opozitë e vërtetë, duke hapur PD drejt prurjeve të reja dhe në këtë mënyrë do të mbjellim shpresën”, tha Berisha.
