Ish-Kryeministri Sali Berisha u shpreh sot nga Përmeti se në Shqipëri ato fenomene që në çdo vend të Botës rrëzojnë Qeveritë, në Shqipëri konsiderohen si gjëra normale.
Berisha u shpreh veçanërisht për korrupsionin, që e konsideroi një vjedhje qeveritare.
“Ku shkojnë paratë tuaja tani? Nëse në qeverisjen e PD u rritën rroga dhe pensione, u ndërtuan mbi 11 mijë km rrugë, u realizuan reforma që integruan vendin në NATO, sot ku janë paratë tuaja? Ku shkuan 8 apo 10 mld dollarë? Ja sheshet u rikosntruktuan me rrasa gurësh që shkuan 200 mln dollarë, po pjesa tjetër ku shkoi? Ndaj dhe ne duhet të denoncojmë te çdo qytetar atë se paratë që paguhen në formë taksash, vidhen”, tha Berisha.
Ai u shpreh se opozita nuk mund të drejtohet me telefona. “Ne do të bëjmë çdo gjë të ligjshme kundër kësaj Qeverie që vjedh dhe largon shqiptarët çdo ditë”, tha Berisha.
Ai tha se opozita do të udhëheqë protestat më të mëdha që ka njohur vendi, deri në rrëzimin e kësaj qeverie.
“E dini ju se shqiptarët sot paguajnë energjinë më shtrenjtë se në SHBA apo Gjermani, megjithëse kemi kostot më të ulëta, sepse e kemi ujore”, tha Berisha.
