Ish-Kryeministri Sali Berisha u shpreh nga Tepelena se nisi bashkëbisedimin me anëtarësinë e PD vetëm për të mbrojtur dinjitetin njerëzor dhe sovranitetin.
Berisha tha se vendimi i shpalljes “non grata” ishte korruptiv, pa asnjë provë dhe fakt, ndërsa akuzoi Edi Ramën dhe George Soros se kishin lobuar për marrjen e këtij vendimi nga Sekretari amerikan i Shtetit.
Ish-Kryeministri tha se iu drejtua Gjykatës lidhur me vendimin për të treguar se ishte një vendim politik dhe korruptiv.
“Nuk lobova, nuk shpenzova asnjë qindarkë dhe nga z. Blinken pres të më kërkojë të falur publikisht, asgjë tjetër, pasi është një vendim korruptiv dhe politik”, tha Berisha.
Ish-Kryeministri tha se e nisi betejën jo se ishte 100 % i sigurtë, por për të mbrojtur dinjitetin e tij.
“Ka dy Amerika. Ka një Amerikë që më ka shpallur “non grata” dhe në këtë Amerikë kam njohur nga i pari i tyre te zyrtari më i thjeshtë, por kurrë nuk i kam kërkuar që të heqin vendimin e diktuar nga George Soros.
Ka edhe një Amerikë tjetër, ajo republikane. Është kjo Amerikë që iu përgjigj me njeriun më të informuar, ambasadorit Grenell, i cili thotë se s´ka pasur asnjë provë apo fakt. I bindur të jesh se ky person nuk merrte përsipër të bënte një deklaratë të tillë, nëse nuk do të ishte 100 % i sigurtë”, tha Berisha.
Gjithashtu ai përmendi kongresmenin Lee Zeldin, i cili i ka thënë Sekretarit amerikan të Shtetit, se nuk ka prova dhe fakte.
“Pse u godita unë? Vetëm që PD të bëhej shtojcë e PS-së”, tha Berisha. Ish-Kryeministri shprehu bindjen se do të fitojë ndaj regjimit të Edi Ramës.
“Në vitin 1998 kishim botën kundër dhe fituam. Pse fituam? Sepse besoj te e vërteta”, tha ai.
