Është mbyllur në barazim pa gola pjesa e parë mes Spanjës dhe Shqipërisë. Ashtu siç pritej, skuadra e drejtuar nga Luis Enrique ka dominuar në qarkullimin e topit duke i lënë pak hapësira kuqezinjve të Rejës.
Iberikët e nisën sfidën në sulm teksa në minutën e 4-t regjistruan rastin e parë për gol. Ferran Torres shpërthen në krahun e majtë dhe në diagonale mundohet të kalojë Berishën, por gardiani kuqezi devijon jashtë.
Ndërkohë në minutën e 12-të Shqipëria pretendon për 11-metërsh. Shpërthim i Balliut në krahun e djathtë, ai nis topin në qendër për Cikalleshin i cili rrëzohet pas një kontakti, por gjyqtari bën shenjë që loja të vazhdojë.
Në minutat në vijim, spanjollët vazhdojnë qarkullimin e topit, me përfaqësuesen shqiptare, që mundohet të mbajë Spanjën sa më larg portës së Berishës duke ushtruar pressing.
Armando Broja shfaqet i rrezikshëm në minutën e 38-të ku bën 40 metra me topin në këmbë mes futbollistëve kundërshtarë dhe në fund fiton një goditje këndi.
