Është zhvilluar këtë të enjte seanca gjyqësore për masën e sigurisë në ngarkim të tre personave të arrestuar nga policia e Vlorës tre ditë më parë.
Ariel Kingji, Kristi Drolli dhe Shpati Lena u arrestuan ndërsa ishin duke lëvizur me automjet në zonën e Ujit të Ftohte, të dyshuar për ngjarjen e ndodhur në 4 gusht 2019 në plazhin e vjetër, ku mbeti i vrarë Arben Beqiraj dhe u plagos djali i tij, si dhe një i afërm i tyre.
Seanca është drejtuar nga gjyqtare Arbana Selmanaj, ndërsa prokuror ka qenë Hyrjet Lamaj. Gjykata e Vlorës ka vendosur masën e sigurisë “Arrest në burg” për Ariel Kingji dhe Kristi Drolli, ndërsa është vendosur masa detyrim paraqitje për shtetasin Shpati Lena.
