Nga Boldnews.al
Tregu i oksigjenit spitalor ka pësuar rritje të konsiderueshme gjatë dy viteve të fundit, si pasojë e pandemisë globale. Dhjetëra miliona euro janë tenderuar nga spitalet rajonalë dhe lokalë për të blerë oksigjen për të sëmurët, një treg i cili është kapur në Shqipëri nga dy kompani: GTS dhe Messer.
Dy kompanitë bashkëpunojnë me njëra-tjetrën, duke eliminuar konkurrencën, teksa bëjnë rotacion për të fituar tenderët e majmë. Përshembull, nëse hapet tenderi i QSUT-se merr pjesë vetëm njëra prej tyre, duke i “hapur” rrugën tjetrës, me qëllim që të marrin edhe qindarkën e fundit të shtetit.
Dhe, ajo s’mori pjesë në tenderin e QSUT-së fiton tenderin e Senatoriumit, e kështu me radhë. Zakonisht, firma që ka vendosur tankerin e oksigjenit në një spital universitar, rajonal apo lokal, fiton edhe tenderin e blerjes aë oksigjenit. Në këto radhë do të ndalemi te oksigjeni i QSUT-së, ku ish-drejtori Enkelejd Joti, tashmë i katapultuar te RTSH, ka shpallur fitues kompaninë GTS. Në hyrje të QSUT-së, qendron tankeri i kësaj kompanie, me mbishkrimin me gërma kapitale GTS.
Sipas dokumenteve që disponon Boldnews.al, QSUT ka hapur tenderin për mirëmbajtjen e pajisjeve të oksigjenit, pikërisht të pajisjeve të firmës GTS!
Por, përse kjo ndihmë?
Sipas dokumenteve, objekti i tenderit “riparim – mirëmbajtje sisteme ajri të vakumuar dhe komprimuar, tanker oksigjeni, rampa oksigjeni, linjat e pajisjet përkatëse për nevojat të QSUNT për një periudhë mbulimi 24 muaj”.
Më tej thuhet se vlera e pritshme e kontratave që mund të lidhen gjatë marrëveshjes kuadër është 9.832.692 lekë, ose me TVSH shuma shkon në rreth 100 mijë euro. Kohëzgjatja e kontratës është 24 muaj, ndërkohë tenderi do të zhvillohet në datë 29 mars.
Por, kaq pak po kërkon Niku?! Nëse është kjo shumë, atëherë përse kërkon ndihmë nga Fico? A nuk do ishte më e udhës që këto para’ Niku t’ia falte QSUT? Ndoshta si formë shpërblimi pas miliardave të marra këto dy vite.
Dhe, nëse nuk i takon, përse nuk bën një bamirësi, që këtë vlerë ta paguajë nga xhepi! Natyrisht, gjatë kësaj kohe, çdo firmë ka shfrytëzuar çdo të keqe të mundshme për të fituar para’. Në kurriz të të gjithëve ne.
