Mësohet se 24-vjeçari nuk do të përballet vetëm me akuzën e “Plagosjes së rëndë me dashje” kryer në bashkëpunim, por edhe me dy akuza të tjera, siç janë: “Kultivimi i lëndëve narkotike” kryer në bashkëpunim dhe “Vjedhja e energjisë elektrike” kryer në bashkëpunim.
Kjo pasi në një ambient në pronësi të familjes së tij, gjatë operacionit për arrestimin e tij për dhunimin e kuzhinierit, Policia zbuloi se ishin kultivuar bimë narkotike, ndaj edhe bashkë me 24-vjeçarin, u arrestua edhe babai i tij, për të cilin gjykata vendosi “Arrest shtëpie”.
Gjatë aksionit, Policia gjeti dhe sekuestroi shuma të konsiderueshme parash, 1,822,000 lekë dhe 37 000 euro, të dyshuara si të përfituara nga veprimtaria kriminale e kultivimit dhe trafikimit të lëndëve narkotike. Prokurori Olgert Rumnici kërkoi masën e sigurisë arrest në burg për babë e bir, por vetëm për njërin (djalin) Gjykata pranoi kërkesën e Prokurorisë. Mësohet se për babanë e Ernestit, Llesh Luka.
Gjykata vendosi të caktojë masën e sigurisë “Arrest në shtëpi”, për shkak të gjendjes shëndetësore jo të mirë dhe moshës së thyer. Llesh Luka akuzohet nga Prokuroria për veprën penale “Kultivim të lëndëve narkotike” kryer në bashkëpunim dhe “Vjedhje të energjisë elektrike” kryer në bashkëpunim. Ndërkohë, për djalin tjetër të Llesh Lukës, Donald Lukën, Gjykata e Krujës caktoi masën e sigurisë “Arrest në burg” në mungesë, pasi ai vijon t’i fshihet drejtësisë. Indrit Çela ka deklaruar për oficerët e Policisë së Krujës: “Isha duke udhëtuar me një mjet të markës SMART nga Fushë-Kruja në drejtim të aeroportit Rinas, së bashku me një mikeshën time, italiane. Në këtë moment më sulmuan barbarisht”.
DËSHMIA E ERNEST LUKËS
“Në 19 mars 2022, dola nga banesa me automjetin tim ‘Benz-Mercedes’, për të shkuar në Tiranë, dhe në momentin që isha duke ecur tek ura e Gjolës, një automjet që lëvizte pas meje më goditi në prapakolpin e makinës. Ndalova mjetin dhe dola prej tij për të parë nëse ishte dëmtuar shumë makina nga goditja. Në këtë moment ai doli dhe po më ofendonte me fjalë të rënda. Më pas situata u agravua dhe u përplasëm fizikisht, duke u goditur me njeri-tjetrin. E njoha menjëherë këtë person, pasi disa muaj më parë na qëlluan mua dhe babanë tim me sende të forta. Mora xhiron e makinës dhe e godita disa herë. Sa u përket bimëve narkotike, ato i kam mbjellë unë dhe s’ka përgjegjësi asnjë prej pjesëtarëve të familjes sime. Paratë e sekuestruara janë paratë e fituara nga biznesi i tim vëllai, i cili ka një dyqan mishi dhe bar-restorant”, ka deklaruar 24-vjeçari./ Panorama.al
