Një banesë në katin e katërt të një pallati në Tiranë është përfshirë nga flakët paraditen e së martës.
Shtëllunga të mëdha tymi janë parë të dalin nga banesa, që ndodhet në kryqëzimin mes Rrugës së Barrikadave dhe Unazës së Tiranës.
Nga informacionet paraprake nuk raportohet për persona të bllokuar në banesë, apo të lënduar.
Njoftimi i Policisë:
Më datë 22.03.2022, në Rrugën e Barrikadave, në katin e tretë të një pallati, ka rënë zjarr në banesën në pronësi të shtetases F. A., dhe si pasojë ka vetëm dëme materiale.
Në vendngjarje ndodhen forcat zjarrfikëse të cilat po punojnë për fikjen e zjarrit.
Vijon puna nga grupi hetimor për zbardhjen e rrethanave të ngjarjes dhe përcaktimin e shkakut të rënies së zjarrit.
