Partizani duket akoma në një periudhë tranzicioni. Me Kastriotin ishte një humbje e hidhur në transfertë 1-0, për javën e 26 në Superligë. Krutanët po kalojnë një formë të mirë, duke marrë tri pikët, ndërkohë që Partizani vuante mungesat.
Jashtë ishin tre prej titullarëve, me dy prej tyre që u afruan në merkaton e janarit. Bitri dhe Skuka kanë ndryshuar repartet e mbrojtjes dhe sulmit te të kuqtë, munguan prej kartonave. Pas ndeshjeve të Kombëtares dhe me fitimin e formës në ndeshjen e Kupës, kjo dyshe është gati sërish për Partizanin e Superligës.
Një rikthim tjetër i rëndësishëm është ai i Albion Markut, i cili është ndër më të dalluarit në Partizanin e këtij sezoni të vështirë. Titullari fiks i Mehmetit mungoi gjithashtu prej ndëshkimit me të kuq në ndeshjen me rrogozhinasit. Egnatia dhe Kastrioti që luftojnë për një vend në Superligën e sezonit të ardhshëm, e goditën Partizanin në objektivin Europë.
Me treshen që rikthehet në formacionin e tij, Mehmeti buzëqesh sërish. Sfida e radhës për Demat në kampionat është në 3 prill kundër Laçit në shtëpi, teksa më herët do përballen me Vllazninë në Kupë.
