Një operacion i autoriteteve spanjolle ka shkatërruar një organizatë kriminale, të dyshuar të përfshirë në trafik droge.
Banda shqiptare kultivonte marijuanë, në shtëpi të mëdha të shpërndara në vende të ndryshme në provincën e Malagas në Spanjë, shkruajnë mediat spanjolle.
Ky operacion nisi në maj 2021, kur hetuesit gjetën se në një banesë në Coin kishte kanabis e prej andej vinte një erë shumë e fortë.
Hetimet treguan se pas erës së fortë kishte marijuanë dhe se ishte një bandë e tërë, që përdorte shumë banesa, për kultivim të lëndëve narkotike.
Pas disa muajsh hetime agjentët gjetën edhe 6 shtëpi të tjera me karakteristika të ngjashme në komunat Mijas, Alhaurín de la Torre, Marbella dhe Fuengirola, që përdoreshin gjithashtu nga organizata.
Nga hetimi ka mundur të konstatohet se drejtuesit e rrjetit kriminal ishin ngarkuar me sigurimin e logjistikës së nevojshme, ndërsa anëtarët e tjerë kryenin detyrat e ruajtjes së banesave. Gjatë operacionit u arrestuan 15 anëtarët e organizatës, të gjithë me kombësi shqiptare.
Njëra prej shtëpive përdorej si tharëse për marijuanën që kultivohej në plantacionet e tjera, duke lokalizuar në të 127 kilogramë sytha droge të gatshme për shitje.
Nga operacioni u sekuestruan gjithsej 3696 bimë marijuanë në faza të ndryshme të rritjes, 167 kilogramë sytha marihuane, 6336 euro, 3 automjete dhe 1 detektor të sistemit GPS.
