Deputeti Ervin Salianji u shpreh mbrëmjen e sotme se ka dyshime se dorëheqja e Lulzim Bashës është një truk, pasi ai shpalli një vendim pa u konsultuar.
“Më bën të mendoj se mund të jetë një truk, pasi nuk u konsultua me askënd, mori një vendim të cilin e tha ashtu si shumë vendime të tjera që ka marrë”, tha Salianji në emisionin Të Paekspozuarit.
Salianji u shpreh se ndoshta në ditët në vijim do të ketë të tjera vendimmarrje, por nëse Basha ka bërë një truk ky do të jetë fundi i mundësisë për bashkimin e demokratëve.
Ai tha se propozimi i hedhur në mbledhjen e zhvilluar ishte që një nga nënkryetarët të drejtonte PD deri në zgjedhjet vendore, por shtoi se kjo nuk ka sens, dhe nuk është një zgjidhje e duhur.
“Do jetë Këshilli Kombëtar ai që do të marrë vendimet, bazuar në statutin e PD”, tha Salianji.
