Tre persona janë arrestuar mbrëmjen e djeshme në një aksion anti-drogë nga policia e Lezhës, që ka sekuestruar 40 kilogramë kanabis.
Në pranga u vunë Durim Mehmedaj, Erdgys Arrazi dhe Izmir Dervishi.
Policia njoftoi se bazuar në informacionet e marra në rrugë operative se disa shtetas po transportonin lëndë narkotike, me 2 automjete, në rrugën nacionale Shkodër – Lezhë, u organizua dhe u finalizua operacioni policor i koduar “Zadrima”.
Si rezultat, u bë lokalizimi dhe ndalimi i dy automjeteve.
Gjatë kontrollit në automjetin tip “Volkswagen”, me drejtues Izmir Dervishin, shërbimet e Policisë gjetën dhe sekuestruan në cilësinë e provës materiale 5 thasë plastmasi të mbushur me material bimor të dyshuar lëndë narkotike kanabis, e cila pas peshimit rezultoi 40 kilogramë.
Në automjetin tjetër tip “Seat” ndodheshin shtetasit Durim Mehmedaj dhe Erdgys Arrazi, të cilët shoqëronin automjetin ku u gjet lënda narkotike.
Në përfundim të veprimeve të para hetimore u bë arrestimi në flagrancë i shtetasve: Izmir Dervishi, 31 vjeç, Erdgys Arrazi, 28 vjeç dhe Durim Mehmedaj, 37 vjeç, të tre banues në Shkodër.
Nën drejtimin e Prokurorisë, vijon puna për identifikimin dhe kapjen e personave të tjerë të përfshirë në këtë veprimtari kriminale, ndërsa materialet procedurale i kaluan Prokurorisë së Rrethit Gjyqësor Lezhë, për veprime të mëtejshme, për veprën penale ”Prodhimi dhe shitja e narkotikëve”, kryer në bashkëpunim, shtuan të njëjtat burime.
