Lulzim Basha artikuloi sot dorëheqjen si Kryetar i PD, edhe pse nga Komisioni i Rithemelimit konsiderohej si kryetar i shkarkuar me Kuvendin Kombëtar të 11 dhjetorit dhe më pas me referendumin e anëtarësisë me 18 dhjetor.
Por duke mos njohur asnjë nga vendimet, dhe duke pasur mbështetjen më të madhe të Grupit Parlamentar, Basha nuk njohu asnjë nga vendimet, duke vijuar të qëndrojë në krye të PD, duke mbajtur logon, vulën dhe selinë.
Deri në 6 mars, datë kur u mbajtën edhe zgjedhjet e pjesshme vendore, Basha dukej se kishte gjithçka nën kontroll në atë që mund të konsiderohej si partia e tij.
Pas kësaj date, pozitat e Lulzim Bashës u lëkundën, pasi kandidatët e caktuar prej tij si kryebashkiak, në 5 nga 6 bashkitë u renditën të 3-ët, duke qenë disa mijëra vota pas kandidatëve të mbështetur nga ish-Kryeministri Sali Berisha, të cilët garuan me koalicionin “Shtëpia e Lirisë”.
Pjesa më e madhe e grupit parlamentar i kërkuar Bashës të bënte një hap pas, pra të dorëhiqej, duke e cilësuar si një barrë për PD.
Sot Basha kishte thirrur një mbledhje të zgjeruar të Grupit Parlamentar, Kryesisë dhe Kolegjit të Kryetarëve ku edhe njoftoi aktin e dorëheqjes.
Por jo të gjithë deputetët ishin prezent, pasi ajo çka pritej ishte një përballje mes Kolegjit të Kryetarëve, që i kishte dhënë mbështetje Bashës, dhe deputetëve më kritikë ndaj tij. Nga raportimet mësohet se në mbledhje mungonin rreth 14 deputetë mes të cilëve edhe Alfred Rushaj, Agron Gjekmarkaj, Grida Duma etj.
Deputetët që munguan
Agron Gjekmarkaj
Grida Duma
Tomorr Alizoti
Helidon Bushati
Xhelal Mziu
Ramadan Lika
Alfred Rushaj
Andia Ulliri
Elda Hoti
Ferdinant Xhaferri
Flamur Hoxha
Flutura Acka
Merita Bakiu
Oriola Pampuri
