I shoqëruar nga ministrja e Financave, Delina Ibrahimaj, Kryeministri Edi Rama u shfaq sot si kontrollor çmimesh në markete dhe furra buke, ndërsa u shpreh se tashmë kemi pak frymë anti-kapitaliste, por njerëzit janë në stres dhe duhen mirëkuptuar.
Rama u njoh me luatjet e çmimeve, duke filluar nga buka dhe te produktet e shportës, ndërsa kërkoi marzhe sa më të ulëta fitimi nga tregtarët, në këtë kohë.
Kryeministri tha se në këtë situatë nuk duhet që të ketë abuzime në treg dhe se çmimet e produkteve duhet që të mos fusin në vështirësi as bizneset dhe as qytetarët.
Ai paralajmëroi gjithashtu se do të ndëshkohet çdo abuzim me çmimet përtej asaj që vendos Bordi i Administrimit.
“Kjo është një fazë vështirësie për të gjithë, pavarësisht se këtu tendenca është që t’i hidhet faji furnizuesve, prodhuesve e tregtarëve. Jemi pak në atë frymën antikapitaliste në këto momente. Por duhen mirëkuptuar njerëzit që kanë këtë stres. Por ajo që ne duhet të bëjmë është të mos lejojmë abuzimet sa të mundemi. Çmimet duhet të jenë të tilla që edhe ju të mos futeni në vështirësi, por të nxirrni një minimum fitimi që ju duhet për të vazhduar në këtë periudhë. Jo për të shfrytëzuar rastin për të nxjerrë më shumë fitime se sa në kohë normale.
Duhet të jeni shumë solidarë që të mos përfitoni në kurriz të njerëzve që këto i kanë bazë. Ju jeni biznes i vogël, nuk keni taksa dhe as TVSH. Nuk duam të ngarkoheni me taksa. Nuk mund t’ju rrisim taksat në këtë fazë, është diçka që nuk mund ta bëjmë. Tani ju takon edhe juve që të jeni maksimalisht të vëmendshëm që njerëzit të marrin atë që ju takon. Ju jeni model këtu”, tha Rama.
