Regi Lushkjes nuk i është dashur shumë kohë që të bëhet protagonist në futbollin moldav. Mesfushori i cili u largua në ditët e fundit të merkatos nga Laçi drejt Sherif Tiraspol, ka gjetur rrugën e rrjetës që në ndeshjen e tretë në kampionat me fanellën e kësaj skuadre.
Lushkja e nisi ndeshjen e sotme ndaj St. George nga stoli, por trajneri vendosi ta aktivizonte kur shënohej minuta e 60 e duelit dhe shifrat ishin ende 0-0. Futbollistit shqiptar iu deshën vetëm dy minuta në fushë për të kaluar në avantazh skuadrën e tij.
Ai përfitoi nga një pasim nga e majta për të dërguar sferën në rrjetë e për të kaluar para ekipin e tij, i cili më pas e kishte më të thjeshtë të thellonte avantazhin dhe të mbyllte duelin me shifrat 3-0 për të mbetur në 7 pikë diferencë nga ndjekësi më i afërt në renditje.
