Ambasadori i Bashkimit Europian në Shqipëri, Luigi Soreca, nuk do të shërbejë më në Tiranë duke filluar nga 1 prilli.
Duke folur nga Kolonja, ai tha se vendi ka bërë progres të dukshëm përgjatë 3 viteve të shërbimit të tij si Ambasador, ndërsa shtoi se është besimplotë se po largohet në prag të çeljes së negociatave me BE.
Sa i takon rritjes së çmimit të ushqimeve dhe kaburantit, ai thotë se është e rëndësishme të mbrohen familjet në nevojë dhe bizneset e vogla.
Ai nuk përjashtoi dhe një paketë ndihmash nga Brukseli nëse lufta në Ukrainë zgjat.
Krizën në PD nuk preferoi ta komentojë, por theksoi se pasuesi apo pasuesja e tij në krye të delegacionit të BE në Tiranë do të bashkëpunojë me partitë politike që do mbështesin integrimin në BE.
I pyetur nëse në këtë listë bën pjesë dhe Sali Berisha, Soreca nuk preferoi të përgjigjet.
Më poshtë prononcimi i plotë i Sorecës për gazetarët
– Ambasador, me tepër se 3 vite në Shqipëri për ju ndërkohë që Shqipëria nuk ka bërë asnjë përparim konkret në integrimin Europian. Nga ana tjetër një tjetër objektiv i juaji ishte dhe reforma në drejtësi, e cila nuk ka prodhuar asnjë rezultat të prekshëm. Si ju bëjnë të ndiheni këto dy fakte?
Soreca: Kur arrita punën në Shqipëri ishte e nevojshme që Shqipëria të përmbushte disa kërkesa, sundimin e ligjit, lufta kundër korrupsionit, krimit të organizuar. Shqipëria ka bërë përparime të duhura në 24 Mars 2020 kur Këshilli mori vendimin e duhur të Shqipërisë. Vitin e shkuar në Qershor ishte Këshilli që vendosi që Shqipëria kishte plotësuar çdo kusht të kërkuar, këto nuk kishin ndodhur më parë. Borell tha se është shumë e rëndësishme të çelen negociatat për Shqipërinë. Jam besimplotë se largohem në prag të çeljes së negociatave. Reforma në drejtësi ka patur ecuri, tani flasim për konsolidimin e institucioneve. E njoh gjyqësorin për shkak të punës sime dhe këto gjëra kërkojnë kohë. Vettingu do vazhdojë, dy ditë me parë një gjyqtar tjetër erdhi në Gjykatë Kushtetuese.
– A ka BE një plan konkret ndihmash për Shqipërinë në këtë kohë krize?
Soreca: Jam plotësisht i vetëdijshëm për rritjen e çmimeve të ushqimeve dhe karburantit. Është e rëndësishme të mbrohen familjet në nevojë dhe bizneset e vogla. Kjo vjen në sajë të luftës dhe jo në sajë të sanksioneve. BE do jetë afër Shqipërisë, siç ka qenë dy herët e fundit në pandemi e tërmet. Ndihma do të vazhdojë në qoftë se lufta do të vazhdojë.
-Po e lini Shqipërinë në kushtet kur PD është në krizë të thellë? Një koment për këtë?
Soreca: Unë nuk komentoj për zhvillimet e asnjë partie por jam i sigurt që ai/ajo që do zërë vendin tim do bashkëpunojë me partitë politike që do mbështesin integrimin në BE.
– Edhe me Zotin Berisha?
Nuk përgjigjet.
