Ambasada amerikane në Tiranë i bën thirrje qytetarëve amerikane “të shmangin çdo tubim të madh në qytet”, teksa informon për zhvillimin e protestës në orën 11:00 para kryeministrisë.
“Ditën e shtunë, datë 19.03.2022, me fillim në orën 11:00 para Kryeministrisë në bulevardin Dëshmorët e Kombit, është planifikuar të zhvillohet një protestë. Këto protesta kanë potencialin të përhapen në rrugët përreth duke shkaktuar bllokime të trafikut, devijime dhe mbyllje të rrugëve. Krahas kësaj proteste të planifikuar ka pasur disa protesta të paplanifikuara dhe të paparalajmëruara në të gjithë Tiranën dhe në mbarë vendin. Këto protesta shpesh ndodhin pranë hapësirave të grumbullimit publik dhe/ose ndërtesave qeveritare dhe mund të ndodhin në çdo kohë të ditës. Qytetarët amerikanë këshillohen të shmangin çdo tubim të madh në qytet. Ndërsa shumë ngjarje të mëdha publike mund të zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme dhe pjesëmarrësit mund të zhvendosen në pjesë të tjera të qytetit. Monitoroni mediat lokale për informacionet më të fundit dhe ndiqni udhëzimet e autoriteteve lokale të zbatimit të ligjit”, thuhet në njoftimin e ambasadës.
Ambasada këshillon qytetarët amerikanë:
- Shmangni tubimet e mëdha dhe çdo zonë ku demonstratat janë të pashmangshme ose në vazhdim.
- Jini të vetëdijshëm për çfarë ndodh rreth jush.
- Monitoroni mediat lokale për përditësime.
- Mbani një profil të ulët
Thirrje të ngjashme ambasada ka bërë edhe në datat 9, 10 dhe 11 Mars.
Prej ditësh, qytetarët protestojnë në Tiranë pas rritjes së çmimeve të produkteve bazë. Këtë të Shtunë zhvillohet protesta e radhës nga ora 11:00, ndërsa qytetarët kanë dalë me disa kërkesa drejtuar qeverisë. Protesta janë zhvilluar edhe në qytete të tjera të vendit.
