Gjykata e Lartë ka lënë në fuqi vendimin e Apelit të Vlorës për Aleksandër Llanajn, Ani Begajn dhe Bertil Aliajn, të akuzuar e dënuar për masakrën e Çoles në Vlorë, ngjarje e ndodhur në vitin 2015, ku humbën jetën 3 persona.
Në këtë mënyrë, Llanaj është dënuar me burgim të përjetshëm, ndërsa Begaj e Aliaj me nga 35 vite burg.
Ata përfitojnë ulje të dënimit për shkak të gjykimit të shkurtuar. Vendimi është marrë të premten nga tre anëtarët e Gjykatës së Lartë, Ilir Panda, Albana Boksi dhe Medi Bici, të cilët lanë në fuqi vendimin e Apelit.
Kjo dosje u rikthye për rigjykim në Gjykatën e Lartë nga Gjykata Kushtetuese në vitin 2017, me pretendimin se gjatë procesit gjyqësor janë gjetur shkelje.
Shtatë vite më parë pas një sherri banal në një lokal në zonën e Çoles, brenda 11 sekondash, mbetën të vdekur Albi Limaj, Haki Rakipi dhe Ardi Velaj.
Ndërsa të pandehur për ngjarjen u morën tre të rinjtë e lartpërmendur, ndaj te cilëve tashmë rëndon një vendim i rëndë i formës së prerë.
