Analisti Preç Zogaj, i cili në daljet publike është shfaqur si një prej mbështetësve të Lulzim Bashës në përballjet e tij me ish-Kryeministrin Sali Berisha, së fundmi është kthyer në një mbrojtës edhe të ambasadores amerikane Yuri Kim, ndaj kritikave që janë hedhur drejt saj, pas rezultatit të zgjedhjeve të 6 marsit.
Në këto zgjedhje, kandidatët socialistë të Kryeministrit Edi Rama fituan 5 nga 6 bashkitë, ndërsa humbën në Shkodër, ku fitoi Bardh Spahia që garonte në siglën e koalicionin “Shtëpia e Lirisë” të ish-Kryeministrit Berisha. Ndërsa kandidatët e PD së Lulzim Bashës u renditën të 3-ët në 5 nga 6 Bashkitë, përveç Rrogozhinës ku dolën në vendin e dytë.
Në mesin e fushatës, diplomatja amerikane bëri një ndërhyrje, duke bërë thirrje që të mos votoheshin kandidatët e mbvshtetur nga Berisha, i cili është shpallur “non grata” nga Departamenti amerikan i Shtetit. Ndërhyrja e Kim u konsiderua si një mbështetje më shumë në favor të Lulzim Bashës në garën mes kandidatëve të tij dhe atyre që mbështeteshin nga Sali Berisha.
“Pyetje për kandidatët: Nëse sponsori juaj kryesor është dikush i caktuar nga SHBA për korrupsion domethënës, çfarë saktësisht po u premtoni votuesve? Kush do t’ju drejtojë nëse fitoni dhe çfarë do t’i detyroheni atyre? Çfarë duhet të presin shqiptarët? Çfarë duhet të presin SHBA?”, do të deklaronte Kim pak përpara zgjedhjeve të 6 marsit.
Ndërkohë pas zgjedhjeve, ku Basha mori një nga humbjet më të thella elektorale që PD ka pasur në 31 vite, diplomatja amerikane nuk bëri asnjë reagim apo koment.
Në shkrimin në gazetën Panorama, Zogaj jo vetëm nuk e quan fitoren e Berishës, por aq më pak e shef atë si një sfidë ndaj politikave të gabuara të Yuri Kim.
“Duan t’i ngarkojnë në kurriz të gjitha fitoret që kishte e ka në mendje Sali Berisha, përfshirë fitoren ndaj SHBA-ve. Është kjo që kanë në majë të gjuhës mbështetësit e tij. E dëgjojmë nëpër emisione, e lexojmë nëpër komente, ku militantët i shkojnë në thelb gjuhës së rrumbullakosur të liderëve kur reklamojnë “humbjen e SHBA-së”, “disfatën e ambasadores” a thua se SHBA dhe ambasadorja Kim kanë marrë pjesë në këto zgjedhje. SHBA, siç e kemi nënvizuar disa herë, mbajnë qëndrime politike në përputhje me përparësitë e politikës së tyre të jashtme dhe me vlerat që mbrojnë. Por nuk ndërhyjnë në zgjedhje, nuk i mbajnë dorën njeriu. Mbështetja amerikane për parti dhe drejtues politikë është premisë për sukses, por jo vetë suksesi. Është një bonus për ata që e kanë. Varet prej tyre ta shndërrojnë në sukses ose jo. Sakaq ata që janë shpallur të padëshirueshëm nga SHBA nuk kanë asnjë shans të fitojnë shumicën për një arsye të thjeshtë: shumica dërmuese e qytetarëve shqiptarë janë proamerikane. Jo vetëm për mirënjohje, por edhe sepse e shohin të lidhur ngushtë me SHBA sigurinë, pavarësinë dhe prosperitetin e tyre”, shkruan Zogaj.
