Kryetarja e komisionit hetimor për impiantet e mbetjeve, Jorida Tabaku deklaroi sot një një konferencë për mediet se “PD po çon në SPAK një kallëzim penal për 50 persona në kuadrin e grupit të strukturuar kriminal”.
Sipas Tabakut, hetimi përgjatë 3 muajve dhe të dhënat e marra më herët kanë prodhuar një kallëzim të tillë penal.
“PD ka dërguar në SPAK një kallëzim të gjatë thuajse 80 faqe të mbushur me 112 prova në lidhje me grupin e strukturuar kriminal, që ka punuar për abuzimin e 430 milionë euro”, tha ajo.
Sipas saj, ky kallëzim penal është kurorëzimi i një pune të gjatë dhe voluminoze të kryer nga Komisioni dhe mbi të gjitha nga Partia Demokratike.
“E vërteta shpaguhet” u shpreh Tabaku, ndërsa i prezantoi medieve se si skema e kompanive të kryesuara nga 3 persona me lidhje tejet të ngushta në qeveri, ka mundur të sigurojë 3 kontrata me vlerë 430 milionë euro”.
Sipas Tabakut, 50 individët e akuzuar duhet të hetohen në grup.
“Të mos ketë dosje të veçanta për hetimin. Te hetohen në një hetim të vetëm. Grupi ka funksionuar si një i vetëm. Kompanitë kanë marrë kredi bankare dhe janë pa eksperiencë. Të hetohen së bashku të 50 individët. Janë po të njëjtët individë që kontrollojnë dhe zbatojnë kontratat”, tha ajo.
Gjatë konferencës për shtyp, Tabaku prezantoi skemën e operimit të kompanive që kanë përfituar kontratat me vlerë 430 milionë euro.
