Është shuar masa e sigurisë “detyrim paraqitje” për dy të dyshuarit për vrasjen e Hekuran Billës.
Pasi u liruan nga burgu në shtator të këtij viti, gjykata ka shuar masën e sigurisë për Sebastian Malin dhe Viktor Markun.
Masat janë shuar, për shkak të mungesës së provave ndaj tyre.
Dajë dhe nip dyshohen se organizuan dhe vranë Hekuran Billën, për hakmarrje, për shkak se Billa ishte dënuar për vrasjen e të afërmit të tyre Prel Marku në Angli. Atra qëndruan më shumë se një vit në qelitë e paraburgimit, më pas për shkak të tejkalimit të afateve ata u dërguan në arrest shtëpie.
Nga hetimet rezulton se nuk janë gjetur prova që i implikojnë ata në vrasjen e Billës.
Viktor Marku është vëllai i Prel Markut, që u vra nga Hekuran Billa në Angli në tetor të vitit 2006. Hekuran Billa ishte dënuar me burgim të përjetshëm nga Gjykata e Kurorës Snaresbook Angli, pasi në tetor të 2006-ës, në një lokal në rrugën “Park Royal”, ai qëlloi me breshëri në drejtim të një grupi personash, duke lënë të vrarë bashkëkombësin e tij, Prel Marku, dhe plagosur Petrit Brahojn, Agron Gjonin dhe Musa Rrahmanin.
