Kryeministri Edi Rama deklaron shpesh se ai dhe qeveria e tij “i janë qepur” ndërtimeve pa leje për të pastruar territorin, sidomos nga paligjshmëria në bregun e detit.
Aksionet me regji të Ramës, të shoqëruara rëndom me pamjet e Policisë së Shtetit duke asistuar në prishjen e godinave të vogla, kanë ngritur dyshimet për goditje selektive dhe vetëm për show.
“Boldnews.al” po sjell disa foto, të realizuara këtë të Mërkurë (dt.16 mars 2022), në një prej godinave në bregun e Dhërmiut, në Himarë.
Zotëruesi i kësaj godine dy-katëshe po kryen një shtesë, e cila, nga fotot, dallohet qartë që nuk duket se respekton rregullat e ndërtimit.
Dhe, një ndërtim pa rregulla, me shumë mundësi, nuk ka marrë as lejen e organeve përkatëse, pasi do të ishte absurde miratimi i një godine të tillë.
Ndërtimi, me shumë mundësi pa leje, po kryhet “nën hundën” e policëve të rreptë.
Vendi ku po kryhet ky lloj ndërtimi është në atë që konsiderohet si pjesa monumentale e Dhërmiut.
Zona e Dhërmiut është pjesë e programit “100 Fshatrat”, ku qeveria ka vendosur të shpenzojë miliona euro për të rritur performancën turistike dhe thithjen e një numri shumë të lartë vizitorësh.
Duke qenë pjesë e këtij programi multi-milionësh, Dhërmiu duhet të jetë në fokusin kryesor të autoriteteve vendore dhe atyre ligjzbatuese, për të penguar çdo lloj abuzimi me tokën apo të ndërtimeve të paligjshme.
Megjithatë, duket qartë se nuk ka ndodhur kështu.
Uniformat blu janë shumë ekspresivë në goditjen e barakave prej llamarine, por ndërtimet reale, ato që përdoren për përfitime nga pronarët e tyre, nuk shihen prej punonjësve të Policisë, të Inspektoratit Ndërtimor Qendror e as atij lokal.
Deri sa të vijnë muajt e verës, kjo shtesë, në dukje pa leje, do të ketë përfunduar dhe do të jetë gati për të pritur turistët.
Ndërkohë, Policia, së bashku me statuset në rrjete sociale të kryeministrit Rama, do të na bindin sërish se janë të vendosur për të goditur paligjshmërinë e për të mbrojtur territorin.
/Nga Boldnews.al/
